【On.cc】菊梓喬3字尾唔恨結婚 生日正日唔同保錡過歌手菊梓喬（Hana）今日（16日）在尖沙咀酒吧街舉行慶生歌迷聚會，約100名歌迷出席，穿上最愛綠色套裝的她接受訪問時表示已多年沒有搞歌迷聚會，並非因她少在港，而是不識懂策劃，加上沒有儀式感，連生日也不會慶祝，今次亦多得朋友幫忙任搞手。11月24日就是39歲生日，她謂是最後1年3字頭的年紀，明年就「20對（即40歲）」，雖然今年發生不少事，但過得開心。問到生日願望，她說：「身體健康，開開心心，青春美麗，搵好多好多錢，想買樓，買好多嘢囉。正日生日我要去韶關出席開幕禮，到時會唱首由音樂人鄧智偉寫嘅新歌。（陳百祥話之前你幫佢足球隊唱歌，令你有好多登台機會？）冇呀，都係好耐嘅事。」菊梓喬搞生日會。3字頭最後1年。問到可想結婚？Hana愕然問：「冇啦啦提咩結婚？人哋話30歲前結婚，我都過咗啦，我冇諗過呢啲嘢，車邊都掹唔到。（緋聞男友保錡早前喺活動上隔空為你唱生日歌？）我零睇新聞，Sorry，都冇人send畀我，唔覺得感動，但係開心祝福，其實唱生日歌又冇生日禮物都好奇怪。（想收咩生日禮物？）現金就得，因為未必知我鍾意乜，費事浪費金錢，試過有粉絲送有泳兒或李幸倪名嘅fans club紀念品畀我，我話唔想收，好好笑。開心今日好多人嚟支持，同埋開心年年生日都有工作，可以和同事過，但生日工作唔會加價。」Hana多次強調希望年年生日有工開，問是否等錢使？她謂：「咁邊個養自己？（欠缺乜唔拍拖？）欠缺金錢，有錢先可以照顧對方。（唔想搵人照顧？）如果生活所需喺對方身上攞，壓力會好大，我覺得自己好有能力先畀到幸福人，我由細到大冇習慣被照顧。（係咪遇過唔好嘅對象，所以覺得要靠自己？）一定係，我遇過好多，約5個度，真係嚇親。（唔公開戀情？）畀到幸福人先啦。（依家有冇拍拖啫？）我唔急住做任何嘢。（你單身？）依家我係好開心，唔想搞到人。大家成日提嗰個人又係同行，唔好影響所有嘢。（正日生日保錡有冇約你食飯？）冇人約，我本身唔鍾意慶祝生日，但生日前後都有人約，不過大家唔識嘅。（係咪因為保錡喺屋企？）我同妹，仲有貓狗住。」提到結婚，她直指早已過適婚年紀。對保錡隔空唱生日歌，她表示不覺感動。問到感情狀況語帶保留。生日正日不會與保錡過。
