【明報即時】陳奕迅演唱會紀錄片首映邀好友捧場Eason患情緒病瞞媽媽陳

【明報即時】陳奕迅演唱會紀錄片首映 邀好友捧場 Eason患情緒病瞞媽媽

陳奕迅《FEAR and DREAMS:NOW is the only reality》於香港舉行首映，第4場特別邀請圈中好友觀看，星光熠熠。（大會提供）

陳奕迅《FEAR and DREAMS:NOW is the only reality》於香港舉行首映，一連放映4場，3場開放給歌迷看之外，第4場特別邀請圈中好友觀看，星光熠熠，包括容祖兒、楊千嬅、梁漢文、馮德倫、許志安、郭偉亮、葉佩雯、岑寧兒和谷德昭等，一班好友難得敘舊，於影院中不停合照傾偈，非常歡樂。

看過紀錄片後，楊千嬅表示意想不到Eason這次旅程這麼精彩，最希望他可以做回30年前那個陳奕迅，「牙牙擦擦」又「開開心心」！

容祖兒表示看完後心情複雜，真正感受到Eason是將生命奉獻給工作的藝術家，她說：「我覺得有啲部分，我好似睇緊鬼片一樣，好緊張，直頭係身同感受，完全感受到佢個fear。佢好似打咗一場仗，一個個難關去克服，佢經過今次後，應該冇嘢可以再嚇到佢。我哋大家都大個，最希望見到朋友，可以每一日做到自己想做的事，每一件事，成功失敗，到最後都希望可以滿載而歸，能於人生中收集好多經驗，好多愛。」

蘇永康表示Eason打網球受傷時，一直於醫院陪伴，亦在他未康復，總是擔心耳仔聽不清時，不時跟他通電話，安慰他不用擔心，他說：「人生入面有很多fear，可能有時有一些問題，不能馬上解決，就先放一邊，學習與問題共存，終有一日可以解決的。 」

梁漢文表示作為好朋友，很早已知道他的一些感受，像早期要取消香港站，正好他們正一起打網球，打到一半收到消息，感受到他的fear，他說：「大家都係男人，我哋又唔會講咁多，見到佢去咁多地方，做咁長tour，戥佢好開心。」

郭偉亮覺得這部電影「好正」，告訴大家無論幾勁的人，都是一個人，而不是超人，任何事都要付出的。至於大家都關心Eason的情緒病，郭偉亮笑說：「佢不嬲都Short㗎啦！哈哈！佢將情緒係歌到發泄出嚟就得㗎啦！唔使擔心，佢有咁多好朋友喺身邊。」

許志安坦言看完紀錄片，自己的心也舒服不少：「感受好深，鏡頭前都係好真實嘅佢，2﹑3年前，我都有fear嘅時候，佢寫咗首歌畀我，我好佩服佢，佢生病過程中，仍然可以咁強。套紀錄片直頭係一粒藥，可以交畀其他有病嘅人，食咗好番嗰種，有呢個朋友，真係好正，歌又正，又帶畀大家好多歡樂。」  

岑寧兒看完紀錄片表示，紀錄片非常珍貴，因為好多時大家好容易忘記台上表演者，也是一個人，電影中一如他唱歌一般誠懇，真實地把所有fear and dreams展示出來，同時也看到Eason也在成長中，她說：「每個人都要適應，好有啟發性。我想同佢講，放假啦，好嘢！好好休息下，再前進。」  

於歌迷分享場，Eason爆出一直沒告訴媽咪自己有情緒病，怕對方擔心，但醜婦終需見家翁，新聞一出，母親即打來問他，為什麼會這麼大壓力，他說：「我真係唔係好緊要，我個病係好輕微，唔係嚴重到行唔到出房門口嗰種。大家唔使擔心。」

Eason演唱會完結後，他在家中沒有工作，已開始想下一次演唱會應該做些什麼，他說：「我直頭係諗不如開個大場，自己唔使咁辛苦，開場不如用《阿士匹靈》，《他一個人》都要唱，諗諗下自己摑自己一巴，咩事呀，放假啦，你仲諗？我不時係演唱會入面吹水，話不如下次是但就咁唱歌吹水咪得囉，但係我反問自己，係唔得㗎，我做唔到，我要有故事骨幹，我𠵱家已經乾晒，或者去西班牙、意大利、巴西，去唔同地方睇騷，吸收唔同文化，睇騷真係好開心，好似我嗰日睇BIG FOUR好開心，覺得許志安好有型，有衝動都練下自己肢體弗啲。」

《FEAR and DREAMS：NOW is the only reality》紀錄片將於本月23日，於陳奕迅官方YouTube channel可付費觀看，費用為30元正。內地地區，亦於同日可以在BiliBili平台上付費觀看。

（即時娛樂）